Snorres Edda (Den yngre Edda)

Verket vert òg kalla Den yngre Edda. Dette for å skilje det frå eit anna verk frå same periode. Det andre verket heiter Den eldre Edda.Dette er ei norrøn samling av dikt om gudar og heltar, med ukjend forfattar. Lenge trudde ein Den eldre Edda var eldst.

Lærebøker i dikting var vanlege i Europa på Snorres tid. Snorres Edda er ei hovudkjelde til kunnskap om norrøn mytologi og om den norrøne måten å dikte på.

Verket inneheld eit forord og deretter tre delar.

I forordet fortel Snorre om Guds skaping av verda. Han skriv om Adam og Eva og om Noas ark. Han skriv òg om dei tre kontinenta på jorda som ein til då visste om: Afrika, Europa og Asia. Der står det òg at dei før-kristne gudane eigentleg nedstamma frå heltar frå Asia.

Etter forordet kjem ein del som heiter Gylvaginning. Denne delen handlar om kongen Gylve. Han får eit syn der han kan sjå noko av alt det spanande og merkelege som dei norrøne gudane held på med. Han ser for eksempel Tors reise til Utgard, Tor som fiskar Midgardsormen, Balders død og ragnarok.

Andre del av Snorres Edda heiter «Skaldskaparmål». Det tyder «diktekunstens språk». Her skriv Snorre meir om gudane og viser korleis ein kan lage skaldedikt ved å bruke mytologiske symbol og avanserte metaforar i språket.

Tredje del av Snorres Edda heiter «Håttatal». Her viser Snorre eksempel på dei norrøne versemåla. Denne delen er også ei hyllest til to norske stormenn: kong Håkon Håkonsson og Skule jarl. Dei levde samstundes med Snorre.

Håttatal er særs vanskeleg å omsetje til moderne norsk, for både rim, rytme og tyding heng nøye saman med det norrøne språket.

• Snorre Sturlason
• Den eldre Edda
• norrønt
• norrøn mytologi