SECUNDUM LUCAM 2

₁factum est autem in diebus illis exiit edictum a Caesare Augusto

ut describeretur universus orbis

₂haec descriptio prima facta est praeside Syriae Cyrino

₃et ibant omnes ut profiterentur singuli in suam civitatem

₄ascendit autem et Ioseph a Galilaea de civitate Nazareth

in Iudaeam civitatem David quae vocatur Bethleem

eo quod esset de domo et familia David

₅ut profiteretur cum Maria desponsata sibi uxore praegnate

₆factum est autem cum essent ibi impleti sunt dies ut pareret

₇et peperit filium suum primogenitum et pannis eum involvit

et reclinavit eum in praesepio

quia non erat eis locus in diversorio

₈et pastores erant in regione eadem vigilantes

et custodientes vigilias noctis supra gregem suum

₉et ecce angelus Domini stetit iuxta illos

et claritas Dei circumfulsit illos

et timuerunt timore magno

₁₀et dixit illis angelus nolite timere

ecce enim evangelizo vobis gaudium magnum quod erit omni populo

₁₁quia natus est vobis hodie salvator

qui est Christus Dominus in civitate David

₁₂et hoc vobis signum

invenietis infantem pannis involutum

et positum in praesepio

₁₃et subito facta est cum angelo multitudo militiae caelestis

laudantium Deum et dicentium

₁₄gloria in altissimis Deo

et in terra pax in hominibus bonae voluntatis

₁₅et factum est ut discesserunt ab eis angeli in caelum

pastores loquebantur ad invicem

transeamus usque Bethleem

et videamus hoc verbum quod factum est

quod fecit Dominus et ostendit nobis

₁₆et venerunt festinantes et invenerunt Mariam et Ioseph

et infantem positum in praesepio

₁₇videntes autem cognoverunt de verbo

quod dictum erat illis de puero hoc

₁₈et omnes qui audierunt mirati sunt

et de his quae dicta erant a pastoribus ad ipsos

₁₉Maria autem conservabat omnia verba haec conferens in corde suo

₂₀et reversi sunt pastores glorificantes et laudantes Deum

in omnibus quae audierant et viderant

sicut dictum est ad illos

₂₁et postquam consummati sunt dies octo

ut circumcideretur

vocatum est nomen eius Iesus

quod vocatum est ab angelo priusquam in utero conciperetur

₂₂et postquam impleti sunt dies purgationis eius secundum legem Mosi

tulerunt illum in Hierusalem ut sisterent eum Domino

₂₃sicut scriptum est in lege Domini

quia omne masculinum adaperiens vulvam sanctum Domino vocabitur

₂₄et ut darent hostiam

secundum quod dictum est in lege Domini

par turturum aut duos pullos columbarum

₂₅et ecce homo erat in Hierusalem cui nomen Symeon

et homo iste iustus et timoratus expectans consolationem Israhel

et Spiritus Sanctus erat in eo

₂₆et responsum acceperat ab Spiritu Sancto

non visurum se mortem nisi prius videret Christum Domini

₂₇et venit in Spiritu in templum

et cum inducerent puerum Iesum parentes eius

ut facerent secundum consuetudinem legis pro eo

₂₈et ipse accepit eum in ulnas suas et benedixit Deum et dixit

₂₉nunc dimittis servum tuum Domine

secundum verbum tuum in pace

₃₀quia viderunt oculi mei salutare tuum

₃₁quod parasti ante faciem omnium populorum

₃₂lumen ad revelationem gentium et gloriam plebis tuae Israhel

₃₃et erat pater eius et mater mirantes super his quae dicebantur de illo

₃₄et benedixit illis Symeon

et dixit ad Mariam matrem eius

ecce positus est hic in ruinam et resurrectionem multorum

in Israhel

et in signum cui contradicetur

₃₅et tuam ipsius animam pertransiet

gladius

ut revelentur ex multis cordibus cogitationes

₃₆et erat Anna prophetissa filia Phanuhel de tribu Aser

haec processerat in diebus multis

et vixerat cum viro suo annis septem a virginitate sua

₃₇et haec vidua usque ad annos octoginta quattuor

quae non discedebat de templo

ieiuniis et obsecrationibus serviens nocte ac die

₃₈et haec ipsa hora superveniens confitebatur Domino

et loquebatur de illo omnibus

qui expectabant redemptionem Hierusalem

₃₉et ut perfecerunt omnia secundum legem Domini

reversi sunt in Galilaeam in civitatem suam Nazareth

₄₀puer autem crescebat et confortabatur plenus sapientia

et gratia Dei erat in illo

₄₁et ibant parentes eius per omnes annos in Hierusalem

in die sollemni paschae

₄₂et cum factus esset annorum duodecim

ascendentibus illis in Hierosolymam

secundum consuetudinem diei festi

₄₃consummatisque diebus cum redirent

remansit puer Iesus in Hierusalem

et non cognoverunt parentes eius

₄₄existimantes autem illum esse in comitatu venerunt iter diei

et requirebant eum inter cognatos et notos

₄₅et non invenientes regressi sunt in Hierusalem requirentes eum

₄₆et factum est post triduum

invenerunt illum in templo sedentem in medio doctorum

audientem illos et interrogantem

₄₇Stupebant autem omnes qui eum audiebant

super prudentia et responsis eius

₄₈et videntes admirati sunt

Et dixit mater eius ad illum fili quid fecisti nobis sic

ecce pater tuus et ego dolentes quaerebamus te

₄₉et ait ad illos quid est quod me quaerebatis

nesciebatis quia in his quae Patris mei sunt oportet me esse

₅₀et ipsi non intellexerunt verbum quod locutus est ad illos

₅₁et descendit cum eis et venit Nazareth et erat subditus illis

et mater eius conservabat omnia verba haec in corde suo

₅₂et Iesus proficiebat sapientia aetate et gratia apud Deum

et homines