詞庫決定作業

「嗱，Jabberwock 係咪一隻真嘅英文詞呀？」
答案（以當時嘅基準嚟講）：唔係

詞庫決定作業（參照英文：Lexical decision task，簡稱 LDT），或者叫詞庫決定實驗，係語言學用到嘅一種實驗方法，尤其係心理語言學成日用。呢種實驗涉及畀參與者睇一拃詞語，再叫佢哋辨別真詞語同假詞語。

做法

内文：心理實驗同偽詞

睇埋：詞庫同語音組合

想像家陣有位語言學家，佢想研究廿一世紀初嘅英文，於是佢就搵咗一大拃英文入面嘅詞返嚟，例如

• Dance（跳舞）
• Money（錢）
• Stone（石頭）

... 呀噉，然後佢又去搵一拃偽詞（pseudoword）返嚟－如果話一隻詞係偽詞，意思係指隻詞合乎隻語言嘅語音組合法則、但查實冇任何意思，例如 Flummol 喺英文入面就係隻偽詞。

跟住語言學家就可以進行實驗，搵拃識講識讀英文嘅受試者返嚟，每位受試者，都叫佢單獨坐喺實驗室入面對住部電腦，做若干次 trialtraai1 ou4，每次 trial 都

• 喺部電腦嘅熒幕上面顯示兩隻詞畀受試者睇；
• 叫受試者決定嗰兩隻詞當中係定唔係「都係真嘅英文詞」（即係要決定「兩隻詞係咪都係喺英文嘅詞庫裏面」）；
• 同時量度（例如）受試者答啱咗幾多條問題，同埋佢哋答起問題上嚟反應有幾快；
• （用統計學行話講）再將呢啲變數設做應變數，分析呢啲變數會受咩因素影響。

應用

睇埋：詞頻效應

詞庫決定作業噉嘅實驗做法喺語言學上可以攞嚟研究好多嘢。語言學家就係用呢種噉嘅實驗發現咗所謂嘅詞頻效應－詞頻效應係指啲人對一隻語言入面出現得密嘅詞，例如喺廿一世紀英文入面，

orange（橙）

出現嘅頻率應該會高過

serendipitous（大致可以理解為好彩、意外嘅噉嘅意思）

而事實表明，受試者對前者噉嘅詞語反應會快啲；喺詞庫決定實驗裏面，詞頻效應係指如果一場 trial 顯示嘅詞係喺隻語言入面出現得密嘅詞，受試者嘅反應會顯著噉快咗，就算係喺唔係用字母嚟寫嘅語言（例如普通話）都一樣係噉。事實係仲有研究者指出，詞頻率係其中一個最能夠影響詞庫決定表現嘅因素。

睇埋

• 心理語言學
• 反應時間
• 促發效應
• 語義網絡