Agnes Buen Garnås

Draumkvedet frå 1984 var første innspeling av dette visjonsdiktet på 20 år og den første nokon gong der vokalstemma blir følgd av instrumentalmusikk.

I Draumkvedet blir dei 43 versa, som ho framførte etter Magnus Brostrup Landstads Norske folkeviser, akkompagnerte av saksofon og fløyte (Harald Gundhus), hardingfele (Knut Buen), orgel (Kåre Nordstoga) og keltisk harpe (Warren Carlström). Arrangementa var tilskipa av Harald Gundhus med utgangspunkt i dei gamle draumkvede-melodiane, slåttar frå Telemark og nyskrive stoff av Knut Buen. Plata vart heidra med Spellemannprisen. Seinare framførte Buen Garnås Draumkvedet jamleg, både med akkompagnement og solo.

I 1989 gav Buen Garnås ut plata Rosensfole saman med Jan Garbarek. Materialet på plata er hovudsakleg balladestoff som til dømes Margjit og Targjei Risvollo, Venelite og Bergjekongen og Riddevall og Grisilla. Desse framførte Buen Garnås i utgangspunktet på tradisjonell måte, men balladane blei akkompagnerte av Garbareks nyskrivne arrangement for saksofon, perkusjon og synthesizer. Utgivinga har internasjonal distribusjon gjennom plateselskapet ECM.

Musikk frå Rosensfole har sidan vorte brukt i koreografen Kristina Gjems’ danseframsyning Et sætera: Ho styrde sine skip (Collage dansekompani, 1992). Buen Garnås hadde fleire turnear saman med Garbarek og Mari Boine nasjonalt og internasjonalt, mellom anna med konsertar i London. Ho medverka også på Garbarek-plata Twelve moons (1992).

Buen Garnås gav ei rekkje konsertar og deltok på mange festivalar både i Noreg og i utlandet. Sjølv om ho først og fremst formidla den tradisjonelle, solistiske kvedinga, samarbeidde ho òg med ei rekkje musikarar om ulike typar av nyskapande prosjekt.

Saman med broren Knut Buen stod Buen Garnås bak Tusseliten og Trippeliti: Norsk barnetradisjon i leik, song og soge, eit prosjekt med folkemusikk for born, som er utgitt både som CD og notehefte (1990). Plata inneheld 43 sullar, viser, regler og forteljingar. Dei to ga vidare ut Stev og slått (1996), ei plateutgiving som også inneheld utfyllande tekstmateriale. I tillegg var ho medmusikar på ei rekkje av brorens plateprosjekt sidan 1970-talet.

Saman med Sinikka Langeland, Halvor Håkanes, Eli Storbekken og Anne Marit Jacobsen turnerte Buen Garnås i 1995 med framsyninga Det syng: Ballader på vandring. Dette prosjektet om nordiske balladar og folketonars vandring over landegrensene resulterte i ei plateutgiving med same tittel i 1997.

I 2002 gav ho ut ei plate med Magnus Brostrup Landstads folkeviser og salmar, Han rider den mørke natt, der den danske perkusjonisten Marilyn Mazur er mellom medmusikarane. Same år kom plata Soltreet, ei samling med nyare og eldre opptak, som dels hadde vore utgitt på kassett tidlegare.

• Ei vise vil eg kveda (sm.m. D. G. Myhren og H. K. Buen), 1978
• «Kvedarskogen har runne på ny i 70-åra», i Årbok for Telemark, 1980, s. 115–137
• 54 viser og stev fra Øst-Telemark (red.), 1984
• Fra profesjonell til amatør (prosjektoppg. Telemark distriktshøgskole, sm.m. K. W. Brennesvik), 1984

• Draumkvedet, 1984 (CD 1992)
• Rosensfole, 1989
• Tusseliten og Trippeliti. Norsk barnetradisjon i leik, song og soge (med hefte), 1989/1990
• Stev og slått, 1996