接受度判斷測驗

接受度判斷測驗，又或者叫可接受度判斷測驗，係實證語言學研究成日用嘅研究方法。根據呢套諗頭，一個人嘅腦入面會有一套對於自己母語「語法應該係點」嘅內隱知識，假如語言學家想探究某隻語言嘅語法，最好就係搵一拃唔同嘅句子，問吓以嗰隻語言做母語嘅人，問佢哋覺得每句句子係咪可以接受，而可接受度判斷作業簡單講就係做呢樣嘢嘅工序。

背景

睇埋：母語、內隱知識、句法同語法

一般嚟講，廿一世紀初嘅語言學界已經唔會再跟從規範語言學講嗰套。規範語言學係一種舊時嘅語言學觀點，強調每個人用起語言上嚟都「應該」跟從某啲語言標準，採取呢種觀點嘅語言工作者會（譬如）同英文制定一套基準，跟從廿世紀初倫敦嘅英式英文，唔跟呢套觀點嘅英語使用者就係「錯誤」或者「唔合格」－縱使嗰啲使用者可能世世代代都係以佢哋嗰套方法嚟使用英文，喺屋企同老一輩講嘢不嬲都係用開佢哋嗰套「唔標準」嘅英文。到咗廿一世紀初，語言學界普遍已經摒棄咗呢種諗法：廿一世紀初嘅語言學家傾向跟描述語言學，認為語言使用者就算從來冇正式學過語法，都會有一套內在嘅知識系統，知道自己嘅母語有咩規則要跟，只不過係呢啲知識好可能係內隱知識，未經訓練嘅人無法有意識噉去思考或者向人解釋。

例如以下呢啲粵語語句，以粵語做母語嘅人就算冇研習過粵語語法，都直覺上會覺得「聽落唔多自然」：

• 「佢買一個蘋果咗。」
• 「佢琴日同朋友玩緊。」
• 「書呢啲我已經睇晒。」

噉係因為粵語有佢嘅語法，組成句子嗰陣有某啲規則係實要跟嘅，例如表示「已完成」嘅咗，應該係要跟實喺動詞後面，所以句嘢應該係買咗一個蘋果。唔跟呢啲潛規則，句子就好可能會「依然 get1 到佢想講乜，但聽落奇怪」。

透過使用接受度判斷測驗，語言學家可以做到好多有用嘅研究，例如呢個世上有好多語言都冇標準化－可能威望低、冇自己嘅詞典、缺乏標準化嘅書寫系統（甚至連書寫系統都冇，有得講冇得寫）呀噉，呢啲語言通常都冇人幫佢哋寫書講解佢哋嘅語法；於是語言學家可以搵一班以呢啲語言為母語嘅人返嚟，叫佢哋做接受度判斷測驗，就可以搵出隻語言嘅「語法潛規則」。

爭議

喺接受度判斷研究中，樣本代表性係一個幾大嘅問題。有陣時有啲研究，甚至被指係齋靠個別語言學家嘅判斷（縱使呢啲語言學家係母語使用者），呢啲研究就廣受批評。

事實表明，語言嘅邊界梗會或多或少有啲含糊，有陣時有啲語句結構，由某啲使用者嘅角度睇係可接受，但係由其他使用者嘅角度睇係不可接受。用粵語做例，粵語同英文都有結果結構（簡單講，即係謂語包含做咗乜同埋結果）但係兩者傳統上語序有分別。以下嘅例句當中 M 係做咗乜或者方法、R 係結果而 O 係受體：

The	blacksmith	hammered	the	metal	flat	.
		M	O		R
	打鐵師傅	用力揼	嚿金屬		扁

成句嘢等同以下嘅粵語：

位	打鐵師傅	用力揼	扁	咗	嚿	金屬	。
		M	R		O

－粵語係方法行先、結果排第二、受體擺尾，相比之下英文就係方法行先、受體排第二、結果擺尾。有研究就試過搵咗兩班受試者，一班喺香港出世同大，另一班就係以粵語為母語、但喺加拿大成長嘅粵藉華人，進行接受度判斷測驗，叫佢哋判斷以下嘅粵語語句：

1. 「我揼扁咗嚿鐵。」
2. 「我揼咗嚿鐵扁。」

當中第二句喺語序上顯然似英文。佢哋嘅研究發現，喺加拿大成長（自細深受英文薰陶）嘅粵藉華人，比較大機會覺得第二句「可以接受」。語言接觸同語言變化等嘅現象表示是但搵隻語言或方言，「係咪可接受」呢樣嘢或多或少有啲主觀，可以受個人經驗影響，而且未必有明確邊界，唔會吓吓做到所有使用者都接受或者所有使用者都唔接受。

相關

• 心理語言學
• 計量語言學
• 直覺判斷
• 內隱知識

文獻

• （英文）（香港繁體） 從句子接受程度論粵語量詞嘅語法限制，中大嘅學術研究文庫